WAZIRI LUKUVI ATATUA KERO ZA WANANCHI WA KAGERA KUHUSU ARDHI AWAPANGUSA MACHOZI WALIODHURUMIWA ARDHI ZAO MUDA MREFU
WAZIRI LUKUVI ATATUA
KERO ZA WANANCHI WA KAGERA KUHUSU ARDHI AWAPANGUSA MACHOZI WALIODHURUMIWA ARDHI
ZAO MUDA MREFU
Waziri wa Ardhi, Nyumba na
Maendeleo ya Makazi Mhe. William Lukuvi awapangusa machozi wananchi wa Mkoa wa
Kagera waliokuwa wamedhurumiwa ardhi zao na walio kuwa na kero za ardhi za siku nyingi ambapo alisikiliza
kero hizo kwa umakini na kuzipatia ufumbuzi wa papo kwa hapo na kutoa haki kwa
waliostahili.
Akiwa Mkoani Kagera katika ziara
yake ya siku mbili Mhe. Lukuvi aliitumia siku yake ya kwanza ya tarehe 19/8/2016
kusikiliza, kupokea na kutatua kero mbalimbali za muda mrefu na zilizoshindikana kwa wananchi kuhusu ardhi ambapo kero nyingi alizisuluhisha
na kuzipatia ufumbuzi.
Aidha kwa wananchi
waliokuwawamejipatia ardhi kwa njia ya udanganyifu au kwa kuwatapeli wananchi
wenzao waliamuliwa kurejesha ardhi hizo kwa wamiliki halali wenye hati
zinazoonyesha mmiliki halali ni nani pia Halmashauri ya Manispaa iliamuliwa
kuwapatia viwanja wananchi ambao walichukuliwa viwanja vyao na kuhaidiwa kupatiwa
viwanja vingine ifikapo mwishoni mwa mwezi huu wa Agosti 2016.
Katika kutoa haki kwa wananchi
Mhe. Waziri Lukuvi alifuta umiliki wa ardhi ya Bw. George Rogers ambye alikuwa
Mtanzania lakini aliamua kuchukua uraia wa
nchi ya Uingereza ambaye alikuwa na mgogoro na wananchi wa kata ya Nyanga
katika Manispaa ya Bukoba.
Bw. Rogers raia wa Uingereza
alifutiwa umiliki wa ardhi aliyokuwa anaimiliki katika eneo la Kata ya Nyanga Manispaa
ya Bukoba kitalu namba 1(b) kilicho kuwa na ekari zaidi ya 1800, pia alifutiwa
umiliki wa eneo la Kibuye katika Manispaa ya Bukoba lenye vitalu 9 na kufutiwa
pia umiliki wa ekari 60 alizokuwa anazimiliki katika eneo la Bugolora Wilayani
Missenyi.
Akitangaza kufuta umiliki wa
maeneo yote hayo Mhe. Lukuvi Alisema kuwa Bw. Rogers na Kampuni yake ya Rockshild
Quality Food Products Ltd hawakufuata utaratibu wa umilikaji wa ardhi
bali yeye na Kampuni yake walijipatia ardhi hiyo kwa njia za udanganyifu kutoka
kwa wananchi.
Aidha Mhe. Lukuvi alisema kuwa
raia wa nchi za Kigeni hawaruhusiwi kuingia mitaani na kuanza kujinunulia ardhi
kwa wananchi bali wanatakiwa kupitia katika kituo cha uwekezaji (Tanzania
Ivestment Center) ambao wanayo dhamana ya kuwapatia wawekezaji au raia wa nchi
za nje sehemu au ardhi za kuwekeza mahala popote nchini.
Mbali na kutatua migogoro ya
mwananchi mmoja mmoja Mhe. Lukuvi alisema kuwa migogoro mikubwa kama ya
wafugaji na wakulima, mgogoro wa
wananchi wa Kakunyu Wilayani Missenyi na Ranchi za Taifa tayari unashughulikiwa
na Wizara nne ambazo ni Wizara ya Ardhi, Nyumba na Maendeleo ya Makazi,
TAMISEMI, Wizara ya Maliasili na Utalii na Wizara ya Kilimo, Mifugo na Uvuvi.
Katika hatua nyingine Mhe. Lukuvi
alisema kuwa ameamua kugawa majukumu ya wizara yake katika kanda ambapo masuala
yote yanayohusu ardhi hayaendi tena Dar es Saalam bali yanamaliziwa katika
kanda hizo na Mkoa wa Kagera upo katika Kanda ya Ziwa ambayo ipo jijini Mwanza.
Mhe. Lukuvi kwenye ziara yake Mkoani
Kagera alifuatana na Kamishna Msaidizi wa Ardhi Kanda ya Ziwa Bw. Joseph
Shewiyo, Msajili Msaidizi wa Hati Kanda ya Ziwa Bi Magrgeareth Mziray, na
Msajili Msaidizi wa Mabaraza ya Ardhi na Nyumba ya Wilaya Kanda ya Ziwa Bi
Dorothy Philip ambapo Wataalam hao wakishirikiana na Maafisa Ardhi wa Halmashauri
za Wilaya walimsaidia Mhe. Waziri Lukuvi kupata ufafanuzi wa kero mbalimbali na
kupata ufumbuzi wa keo hizo katika Mkutano na wananchi uliofanyika katika
viwanja vya Halmashauri ya Bukoba.
MAAGIZO NA MAELEKEZO YA
WAZIRI WILLIAM LUKUVI KWA WATENDAJI WA SERIKALI MKOANI KAGERA KUHUSU MIGOGORO
YA ARDHI
Waziri wa Ardhi, Nyumba na
Maendeleo ya Makazi Mhe. William Lukuvi akiwa Mkoani Kagera katika siku yake ya
pili mara baada ya siku ya kwanza kuitumia kutatua migogoro ya wananchi kuhusu
ardhi siku ya pili ya tarehe 19.08.2016 aliitumia kuaongea na watendaji mbalimbali wa Serikali akiwa mkoani
hapa.
Eneo la kwanza aliloliongelea Mhe. Lukuvi ni kuhusu migogoro ya
ardhi kwa wanachi iliyo mingi ilisababishwa
na Watendaji wa Serikali waliopewa dhamana ya kushughulikia suala la ardhi,
ambapo aliwaonya Watendaji wote kuacha tabia hiyo mara moja. Agizo, aliwaagiza Makatibu Tawala wa Mikoa
wote nchini kuwachukulia hatua za kinidhamu au kuwafukuza kazi Watendaji hasa Maafisa Ardhi watakobainika
kusababisha migogoro ya ardhi katika maeneo yao.
Katika Agizo hilo Mhe. Lukuvi
alimpa Onyo kali Mthamini wa Halmashauri ya Manispaa ya Bukoba Bw. Projestus
Katabalo kuacha mara moja kufanya kazi kwa mazoea bila kufuata sheria, taratibu
na kanuni za utekelezaji wa zoaezi la uthamini.
Eneo la pili, Mhe. Lukuvi alisema kuwa kupitia Wizara yake Serikali
imepanga ndani ya miaka kumi kuwa itakuwa imepanga, imepima na kumilikisha
ardhi yote ya Taifa la Tanzania. Agizo,
Mhe. Lukuvi aliagiza Mikoa yote nchini kuanza kuweka mipango ya kupanga, kupima
na kumilikisha ardhi. Aidha aliuagiza uongozi wa Mkoa wa Kagera kuhakikisha
unatoa hati miliki elfu kumi za ardhi kwa mwaka huu wa fedha 2016/17ambapo
lengo la kitaifa ni hati Laki nne.
Agizo la pili ni kuhusu kupima maeneo yote ya Serikali (Serikali za
Mitaa na Serikali Kuu) pamoja na kubaini majengo yote ya Serikali ambapo yeye
kama Waziri mwenye dhamana atatoa hati maalum yenye msamaha wa kodi ya kumiliki
maeneo ya Serikali ili yaachwe bila kuingiliwa na wananchi.
Agizo la tatu, ni Maafisa Mipango Miji kuhakikisha wanaainisha
maeneo yote yaliyoiva kuwa miji ili yapangwe, kupimwa na kumilikishwa kwa hati
za muda mrefu badala ya hati za kimila. Agizo
la nne ni maeneo yote ambayo wananchi walijenga miaka ya zamani na yapo katika
miji (Makazi Holela) nyumba zisivunjwe bali wananchi Warasmishiwe makazi hayo
kwa kuyapanga.
Eneo la Tatu aliloongelea Mhe. Lukuvi ni Kuhusu Migogoro
Mikubwa ambapo alisema kuwa katika
migogoro hiyo mfano wakulima na wafugaji, alisema kuwa Serikali imeamua kuunda
kamati ya Wizara nne ili kamati hiyo ipitie migogoro yote mikubwa na kutoa ushauri kwa Mawaziri wa Wizara hizo
husika ili kukomesha kabisa migogoro hiyo.
Wizara hizo nia Wizara ya Ardhi,
Nyumba na Maendeleo ya Makazi, Wizara ya Kilimo, Uvuvi na Mifugo, TAMISEMI, na
Wizara ya Maliasili na Utalii.
Angalizo mikoa yote iliagizwa kuacha ugawaji wa Kata na Vijiji
wakati wa Uchaguzi Mkuu bila kuihusisha Wizara ya Ardhi, Nyumba na Maendeleo ya
Makazi kwani mipaka inayotolewa na Mikoa inashindikana kuonana na mipaka ambayohupimwa
ardhini na Wizara ya Ardhi. Ili
kusuluhisha hilo aliagiza Wizara yake kupewa taarifa pale Mikoa inapotaka
kugawa maeneo yake lakini kwa sababu za msingi bila shinikizo la wanasiasa.
Katika kuhitimisha Mhe. Lukuvi
alisema kuwa Wizara yake inatengeneza sera ya Ardhi, Nyumba na Makazi ambaop
aliagiza Maafisa Mipango Miji wote nchini katika Halmashauri, Miji, Majiji, na
Manispaa kuhakikisha wanaitisha vikao vya wadau ili kuamua aina ya rangi
zipakwe katika miji badala ya kila nyumba kupakwa rangi yake na lengo ni
kuifanya miji ipendeze kwa kuwa na mpangilio wa upakaji wa rangi.
Mkuu wa Mkoa wa Kagera Mhe. Meja
Jenerali Mstaafu Salum Kijuu alimshukuru Mhe. Lukuvi kwa kufanya ziara yake Mkoani
Kagera na kutatua kero mbalimbali za wananchi ambapo alimuhaidi Mhe. Lukuvi kuwa maelekezoa na maagizo yake yote
yatafanyiwa kazi na wahusika ili
kuhakikisha migogoro ya ardhi inakomeshwa Mkoani Kagera.
BUKOBAWADAU
Bukoba Wadau ni mtandao unao toa habari na matukio yanayo tokea katika mji wa bukoba pamoja na mkoa wa kagera kwa ujumla.
Email:bukobawadau@gmail.com | Phone :Mc baraka:0784 505045, 0754 505043
Instagram @bukobawadau | Facebook @bukobawadau
